有「亞洲第一中鋒」之稱嘅足球員尹志強，喺9年前今日逝世，終年53歲。尹志強18歲已經加入南華，展開職業足球員生涯，佢亦踢過精工、港燈同麗新等球會。佢先後喺1977年同1985年嘅世界盃外圍賽中，帶領港隊出線。

尹志強除咗係一位出色嘅足球員，佢早年亦都投身演藝事業，1980年佢就同周潤發合作拍攝電影《執法者》，三年後加入亞視，先後接拍電視劇《101拘捕令》系列，飾演警察，形象深入民心，又同藝人米雪拍拖。喺賣座電影《無間道》系列裡面，佢客串飾演一個高級警司。《無間道》導演劉偉強就讚尹志強拍攝嘅時候非常專業，唸對白無乜甩漏，劉偉強後來先知原來係米雪同佢預先排過戲，而佢亦都做足功課先拍戲，態度非常認真。

圖片為尹志強《無間道》劇照，取自網絡。