講起船王,大家第一時間會諗起邊個?世界船王包玉剛?定希臘船王奧納西斯?阿史今日想講嘅係香港第一代華人船王郭甘章。

郭甘章本身係蜑家人,佢自幼以海為家,掌握咗豐富嘅航海經驗同船舶知識,呢啲知識同經驗亦都造就咗佢日後嘅成就。喺鴉片戰爭期間,佢已經同英國人打交道,後嚟英軍佔領香港島之後,郭甘章就上岸成為香港居民之一。1845年,英資嘅鐵行輪船公司喺香港開分行,郭甘章獲聘成為買辦,開始涉足輪船業務。

1852年,郭甘章喺上海興建船塢,專門修理外國船舶,成為洋務運動推行之前中國最早出現嘅工業。兩年後,郭甘章購入鐵行公司無意繼續經營嘅機械工程部同船廠,又將修理船舶嘅業務擴展至香港。而郭甘章事業嘅黃金時期係喺1860年起,果陣佢成立咗發興行,只係用咗十幾年嘅時間,就發展出一隊頗具規模嘅省港澳客輪隊伍。到咗1877年,郭甘章旗下已經有13隻汽船,更成為當年香港航運界嘅華人船王。郭甘章透過海上生意發跡之後,又將業務擴展至地產同其他領域,係香港獨當一面嘅富商。雖然郭甘章剩係識講「洋涇濱英語」(即係Chinese Pidgin English,中文方言同英文夾雜嘅不正規英文),但同外國人溝通完全唔成問題,仲同佢哋相處得好好添,所以外國人經常搵佢擔任殖民政府嘅顧問。

根據1876年嘅統計資料顯示,郭甘章係當年香港繳納最多差餉嘅第三人。而且五年之後,佢交嘅差餉額仲躍上全港第一位,身家之豐厚可想而知。

圖為1890年代香港海邊,原圖嚟自海事處。