喺60年代嗰陣，油麻地唔少商鋪都有店鋪阻街呢個問題，被人捉到法庭就會出告票。據講當時發生一件趣事，話說有法庭處理緊店鋪阻街，有個衣衫不整嘅人認罪，被判罰20蚊，之後法庭審第2宗店鋪阻街，又係呢個人出嚟認罪，法官又判罰20蚊。再之後連續6宗都係同一位被告，法官終於覺得奇怪，點解呢個人可以有咁多鋪喺手，忍唔住問佢咩來頭，呢個人好直接咁話，啲店主唔得閒上庭，所以就俾錢請佢代為上庭交罰款，每個店主都額外俾咗10蚊佢。

計落條數，依位「職業被告」上庭過吓場就有錢賺，嗰日最少已經賺到80蚊，當佢一日返20日工，密密做，一個月閒閒地都有1600蚊，相比當時警察每月400蚊收入，絕對係高薪一族！阿史唔知呢個「職業被告」最後有無被人告妨礙司法公正，不過呢啲呃法庭嘅事，奉勸大家千祈唔好做呀！

原圖嚟自網絡。