前兩日睇新聞話中環灣仔繞道嚟緊今個禮拜日全面通車，上個月首階段通車嗰陣，特首林鄭月娥就同一班官員坐住架開篷雙層巴士，出席開通儀式。阿史就諗起好多年前，紅磡海底隧道通車嘅時候，政府搵咗肥姐沈殿霞做第一個過紅隧嘅市民。

紅隧全長1.86公里，1969年9月1日動工，耗資3.2億港元興建。47年前嘅今日，有關方面為慶祝隧道落成，於紅隧舉行酒會，當時吸引商界嘅祈德尊、利國偉等大批名人參加，真係好熱鬧。去到8月紅隧通車，就請到沈殿霞出席，份量十足。响啟用初期，私家車過海只係需要5蚊。雖然後嚟東隧同西隧相繼落成，但紅隧至今仍然係香港最繁忙嘅過海隧道。

原圖取自網絡。