早兩日講起，鄧小平喺1979年1月尾訪問美國，成為第一位訪問美國嘅中華人民共和國領導人。其實早喺1972年2月21日，當時嘅美國總統尼克遜就已經歷史性訪問中國，標誌住中美關係「破冰」。

當時世界局勢仍然處於冷戰時期，喺60年代中國同蘇聯關係開始轉差，於是美國就趁機會同中國打好關係。1971年，美國國家安全顧問基辛格兩度秘密訪問中國，為尼克遜訪華奠定基礎。到咗1972年2月21日，尼克遜應周恩來總理邀請，訪問北京、杭州同上海，尼克遜仲稱呢次訪問為「改變世界嘅一週」。訪問期間出現經典一幕，話說喺國宴上，大多數美國來賓都唔識用筷子，只可以用刀叉食中餐，而尼克遜出奇地揸住對筷子嚟夾餸食，原來佢一早就諗到訪問中國要食中餐，所以有晒準備，入鄉隨俗學定點樣用筷子，果然醒目。

原圖取自網絡。