北韓領袖金正恩同美國總統特朗普嚟緊會喺越南河內舉行第二次峰會,今次亦都係相隔55年後,再次有北韓領袖到訪越南,對上一次已經係55年前,金正恩阿爺金日成在任嘅事。

金日成曾經喺1958年同1964年先後兩次訪問越南,兩次都係借用中國嘅飛機,經中國飛到越南。據講,今次金正恩喺星期六就已經由平壤搭火車出發,搭咗大約66個鐘,終於去到越南嘅同登火車站,之後就坐汽車去河內。不過今次都唔未算最耐,話說喺2001年,金正恩爸爸金正日搭火車訪問俄羅斯,當時足足用咗24日、架車行咗2萬公里往返俄羅斯,而呢一次亦成為全球搭火車路程最長嘅國家元首訪問行程。

不過話時話,點解北韓啲領導人咁鍾意出訪搭火車,唔通搭火車安全過搭飛機?其中一個講法,就係話金日成同金正日曾經喺1982年測試專機嘅時候,親眼睇住架專機被炸毀,自此之後就好少搭飛機出國。

圖片為金正恩搭火車出發,以及1964年金日成與北越主席胡志明會面,取自網絡。