歷史古跡於興建時動用大批人力物力，以及多年時間，不過摧毀它，可能只需一瞬間。喺阿富汗中部巴米揚谷，曾經有兩座高35和53米嘅佛像，有大約1400年歷史。早於唐代名僧玄奘法師西行求法嘅時候，亦都經過呢個地方，見過呢兩座佛像，喺佢本《大唐西域記》入面提過：「王城東北山阿有立佛石像。高百四五十尺。金色晃曜寶飾煥爛。東有伽藍。此國先王之所建也。伽藍東有鍮石釋迦佛立像高百餘尺。分身別鑄，總合成立。」

不過好可惜，喺2001年阿富汗塔利班份子以禁止崇拜偶像為理由，將呢兩座佛像炸毀，令1400年歷史淪為片片瓦礫。後嚟多國考古學家同復修人員希望修復兩座大佛，不過當中所牽涉嘅技術同重建歷史議題，令外界對修復與否有唔少爭議。

原圖嚟自網絡。