屯門有座好出名嘅山,叫青山。青山以前有唔少其他名,就好似杯渡山、瑞應山、聖山等等,至於點解無啦啦會變成青山,阿史今次就分享吓唔同嘅講法。

話說喺1866年,意大利傳教士西米安‧獲朗他尼,佢繪製咗一幅《新安縣全圖》,首次將當時主要叫做「杯渡山」同「聖山」嘅青山稱之為「清山」,據一啲學者嘅估計,當時獲朗他尼喺青山考察嘅時候,問到當地嘅客家人呢個地方叫咩名嘅時候,啲客家人就答佢「聖山」,但因為客家話「聖」同「清」讀音相似,獲朗他尼就聽錯咗做「清山」,所以佢就喺《新安縣全圖》上將青山標注為「清山」,後來嘅地圖包括《廣東通志》、《廣州府志》亦參考咗獲朗他尼做法,標注為「清山」或「青山」。

但其實「青山」係由20世紀初先至開始普及,所以就有另一個講法話喺1918年,顯奇同了幻兩位法師喺青山寺修道嘅時候,了幻法師見到呢座山周圍都松柏青翠,於是就將呢座山稱之為青山,亦將呢座寺命名為青山寺。

原圖取自網絡。