曾幾何時，九龍城嘅啟德機場係全球最繁忙國際機場之一，回顧佢嘅歷史，絕對同香港嘅發展息息相關。喺第二次世界大戰結束後，啟德機場遍地都係飛機殘骸同頹垣敗瓦，為重建帶嚟好大阻滯。後嚟興建新客運大樓需要唔少時間，當局就搭帳篷用嚟做臨時客運站，不過好天曬落雨淋，啲乘客梗係唔滿意，搞到當時收到唔少投訴。

話說1945年英軍接管咗啟德機場之後，利用機場東北方一棟單層樓作為第二代客運大樓。第二年，啟德機場交由同年成立嘅民航處管轄，航運業亦慢慢復甦。由於當時乘客越嚟越多，客運站距離中心位置太遠，亦好近空軍基地，位置並唔適合，加上海關、入境處等部門需要更大地方辦公，於是當局諗住興建新客運大樓。

不過起樓需要唔少時間，民航處唯有喺機場南岸下水滑道附近，用多個帳篷搭建臨時客運站，亦即係第三代客運大樓。乘客當時要响多個帳篷之間進進出出，先至完成出入境手續。遇到落雨或者太陽高掛嘅日子，乘客唔係被雨淋濕就係出曬汗，好狼狽。直至1947年，第四代客運大樓投入服務，搭飛機嘅乘客先至唔駛咁辛苦。

圖為啟德機場，原圖嚟自網絡。