香港人平時都會用「六國大封相」嚟形容一啲情況混亂、激烈嘅場面，但呢個意思同講戰國嘢嘅粵劇《六國大封相》內容無咩關係，反而係同50年代一宗兇殺案有關，涉及斬人、縱火、掟人落街殘忍犯案手法，轟動一時。

話說單案嘅主角係25歲嘅前國民黨軍官朱盛才，佢當年帶住筆錢由內地落嚟香港，投靠哥哥朱醒才。因為朱醒才喺美國經商，於是細佬朱盛才被安排去灣仔駱克道嘅單位度住，同大嫂關月娥、大嫂個妹妹關月美一家、大嫂細佬關鴻生一家齊齊生活。個單位入面仲分咗床位出嚟，分租畀關月美丈夫個妹黃綺文。

原本諗住落嚟香港做生意嘅朱盛才，好快就將啲錢洗晒，於是成日問大嫂關月娥攞錢，關月娥、關月美同關鴻生太太陳肖就開始對朱盛才「單單打打」，不斷奚落同嘲笑。有次嘈交，朱盛才話終有一日忍唔可忍，就會上演一場《六國大封相》過班女人睇。

雖然呢段時間受盡白眼，但朱盛才中意咗黃綺文，於是搬走同居。1951年11月，朱盛才返灣仔執埋啲行李嘅時候，再次被關月娥、關月美、陳肖三個女人鬧，話佢「生人霸死地」，結果雙方嘈起上嚟，朱盛才一怒之下衝入廚房拎起把斬柴刀，鎖埋道門就話「你哋唔係好想睇我嘅《六國大封相》咩？我早就準備好，刀都買咗個幾月，今日我就要大開殺戒！」佢先後斬死咗關月娥、陳肖同埋關月美3歲嘅囡囡。除此之外，佢仲斬傷關月美，最後仲放火燒屋。佢行出屋走佬時，見到關月美4歲嘅囝囝，居然將小朋友從四樓掟落街。

朱盛才犯下重罪，女朋友都唔敢收留佢，最終朱盛才到警署自首，佢聲稱自己原本只係諗住放火燒屋，點知大嫂反抗，先至犯下彌天大罪。朱盛才被裁定謀殺罪成，判處繯首死刑。

原圖嚟自網絡。