日本東北於2011年今日發生強烈地震,地震所引發嘅海嘯衝擊沿岸城市,造成嚴重傷亡,仲引致福島核電廠核洩漏。震後8年,雖然當地已經逐步修復地震帶嚟嘅破壞,但响呢場天災痛失父親、妻女嘅木村紀夫嚟講,時間無法淡忘錐心之痛。

木村喺地震中失去三位摯愛,父親同妻子嘅遺體於災後幾星期已被發現,惟獨7歲嘅細女阿汐一直毫無消息。木村紀夫肩負照顧大女同媽媽嘅責任,但每年依然會花30日、每日用5個鐘入災區搜索細女。佢堅信阿汐只係失蹤,仍存於世。經過四年半嘅努力,佢响海岸搵到件寫住阿汐姓名同班別嘅藍色校服外套,木村當時話「感覺靠近嗰女一步」。皇天不負有心人,可惜收到嘅係壞消息,喺2016前嘅聖誕前夕,木村响舊屋附近嘅垃圾堆入面,搵到阿汐嘅骸骨。木村會將阿汐同老婆嘅遺骸放埋一齊,等阿汐回到媽媽嘅「懷抱」,母女團聚。

生命雖然好脆弱,但亦都可以好堅強。福島核事故令大部份災民倉促間被迫遷出家園,唔少小動物被遺棄喺災區。事隔8年,當年有份參與災區搜救動物嘅中谷百里,意外咁同當時被救嘅狗狗「金太」重逢。曾經好怕人嘅金太被一對夫婦收養之後,宜家變得好活潑,中谷百里忍唔住抱住金太感動落淚,感慨「你還活着呢」。

當年場災禍造成超過18000人死亡及失蹤,至今仍然有超過五萬人過住避難生活。唔少人銘記災禍帶嚟嘅教訓,透過製作電視特輯、開辦「防災專門學科」等方式,提升大眾嘅災難逃生意識,鼓勵大家做好防災工作,引以為鑑。

原圖嚟自網絡。