以前警察要通緝啲犯人，就會搵目擊者幫手，形容吓疑犯嘅樣貌，再整張拼圖出嚟，等其他同袍幫手搵。但唔講唔知，原來嗰啲拼圖係由眼、耳、口、鼻、頭髮等七個唔同部位嘅「膠片」拼湊出嚟，要用唔少心血㗎！

話說舊時有警員專門負責將人樣嘅7個部份，即係頭髮、面型、眼眉、眼、耳、口同鼻畫喺膠片上面，當證人到咗差館之後，警方會先俾一啲罪犯嘅相佢哋辨認，如果唔啱，警員就會根據證人所描述嘅疑犯樣貌，逐部份逐部份拆出嚟，再印落通緝令上面。有一次，有個女人被殺，仲被割走咗眼眉、眼、嘴唇同埋鼻，最後警員靠一個見過佢嘅女工形容返死者樣貌出嚟，再登報紙，先知道受害者身份，並繼續追查落去。

拆相雖然重要，但有時證人提供嘅線索唔準確，出嚟嘅圖自然唔夠神似。有退休警察憶述，當年有單案打劫案，受害者係一班學生，佢哋去咗差館兩三次，不斷話拆出嚟嘅相同疑犯相貌有所出入，期間提到疑犯嘅花名叫「狗仔」，於是負責拆相嘅警察就寫埋個名落去。後嚟西營盤嘅警察見到嘅形跡可疑嘅人，仲要同疑犯有啲似樣，於是大叫一聲「狗仔」，嗰疑犯立即擰轉頭望警察，當場斷正兼被捕。無論捉賊又好，做嘢都好，隨機應變真係好重要。

圖片為長城別墅兇殺案，疑犯拼圖，取自網絡。