皇帝結婚,自然場面盛大,咁廢帝結婚又如何?末代皇帝溥儀大婚果陣,雖然已經退咗位,不過依然排場十足,仲引出唔少前朝遺老嚟湊熱鬧。至於兩位主角,溥儀有軍警「傍實」,又古又今已經夠奇特,不過點都唔夠「皇后」婉容登上后位嘅過程離奇。

1922年12月1日,17歲嘅溥儀喺故宮舉行結婚大典,清皇朝當時已經被推翻咗11年,排場自然唔會好似之前嘅皇帝大婚咁舉國同慶,不過自古以嚟嘅儀式排場都係免不了。先係迎娶儀仗隊出神武門,一路上大鼓、牛角齊鳴,頗為熱鬧。唔知係咪驚有人嚟搗亂,現場居然仲有好多武裝軍警持槍警戒,馬路兩邊簡直係人山人海,逼滿晒前嚟觀禮嘅人。

去到下晝,皇后婉容先被儀仗隊經東華門迎入乾清宮,前有兩班軍樂隊開路,後面係坐喺黃緞銀頂轎嘅婉容,跟住係無人乘坐嘅三頂黃緞銀頂車,包括龍鳳旗傘同埋鸞駕儀仗共72副,側邊仲有著住清朝服飾嘅官員同埋中華民國政府派去嘅軍警,都咪話唔大陣仗。就連溥儀本人喺《我的前半生》入面都話呢場婚禮鋪張又離奇。

講開婉容,原嚟溥儀一開始相中嘅皇后並唔係佢。訂婚之前,溥儀睇相揀中嘅,係15歲嘅文繡,不過有太妃就話文繡家境貧寒,樣又唔係生得靚,就叫溥儀再揀過。溥儀唯有再揀多次,揀咗相貌家境都頗優嘅婉容。跟住又有一個太妃走出嚟話,文繡既然一度中選,點可以被遺棄,於是就有咗折衷方案:婉容做皇后,文繡就做淑妃,齊齊成為末代皇帝嘅後宮佳麗。

圖為溥儀大婚當日情景同吉服照,原圖嚟自網絡。