最近收到消息，話上環嘅「蛇竇」做埋下個禮拜一就唔做喇，想幫襯就趁早。大家唔好畀「蛇竇」呢個名呃咗，其實佢係老字號茶餐廳「樂香園㗎啡室」，差唔多成70歲。「蛇竇」下星期一晚上七點就正式結束營業，想幫襯嘅史友要把握機會，留返嘅美好回憶喇。

話時話，好好哋一間茶餐廳點解會叫做「蛇竇」？是咁的，樂香園於1950年喺中環畢打街嘅畢打行後門開業，由於位置隱蔽，所以吸引咗附近嘅打工仔喺下晝嚟歎茶「蛇王」（即係偷懶），慢慢樂香園就被稱為「蛇竇」。「蛇竇」1970年搬咗去威靈頓街，到2008年因租金問題一度結業，一年後於上環機利文新街「重生」。

「蛇竇」有三大招牌食品：滑蛋叉燒飯、雞批同菠蘿包，阿史原本諗住試曬三樣，點知遲嚟一步，雞批同菠蘿包已被一掃而空。搭正上晝11點，侍應姐姐一句：「大家係咪食午餐㗎？」全店一早坐定定嘅客人一齊答「係！」場面既震撼又難忘，而大部份客人都同阿史一樣，叫咗個滑蛋叉燒飯。 

可能係人太多，大約半個鐘碟熱辣辣嘅叉蛋燒飯先嚟到阿史面前，齋睇淡黃色滑蛋加紅卜卜叉燒嘅配搭就已經食慾大振。一啖飯連滑蛋叉燒入口，真係要講返句名不虛傳。滑蛋炒得恰到好處，唔會太老，撈飯食一流；叉燒肥瘦適中，又香又有咬口，證明師傅無因為客人太多而hea做，水準依然。

分手總要在雨天，行出門口，發現店外面已經有好多人冒住微微細雨排隊等入座，人龍排咗成六、七個鋪位，沿機利文新街一直排到出皇后大道中。臨別依依，樂觀咁諗一諗「蛇竇」嘅臨別贈言：「後會？期」，希望仲有機會再見喇 ～