公司附近開咗間「荔園」餐廳,令阿史諗起廿幾年前嘅荔園遊樂場,果陣嘅荔園同宜家嘅海洋公園、迪士尼梗係無得比,不過多得前亞洲電視大股東邱德根,令荔園成為唔少香港人嘅集體回憶。

邱德根1961年由中華電影公司嘅蔣伯光同張軍光手上買咗荔園返嚟營辦之後,就曾經試過去美國加州迪士尼度「偷師」,可惜出師不利,返到香港喺荔園照板煮碗搵人扮迪士尼嘅卡通人物,結果即刻收到迪士尼嘅律師信告佢侵權。不過,邱德根好快就搵到荔園自己嘅特色,荔園最為人熟悉嘅就係佢嘅「三寳」:大笨象天奴、鬼屋同埋擲階磚贏香口膠攤位。

大象「天奴」係邱德根從一個執笠嘅馬戲團手上接收嘅,荔園其他動物例如獅子老虎咁日日都要買生嘅小動物餵佢哋,但天奴唔同,佢可以「無本生利」,因為啲參觀者會爭住買香蕉嚟餵佢,所以邱德根養天奴既慳咗飼料費,又可以賺到賣香蕉嘅錢。不過講到賺錢,點都要提一提掟階磚贏香口膠嘅攤位,當初邱德根參考人哋啲攤位遊戲諗出來,起初收1豪、5豪到1蚊,正所謂積少成多,每日最誇張可以袋成幾萬元,對比返當年6萬蚊就買到太子道兩個單位,攤位可以話係荔園「金蛋」。

除咗天奴、掟階磚攤位,黑麻麻嘅鬼屋都好受歡迎,而邱德根憑住「荔園三寶」,將荔園經營到有聲有色,搖身一變成為香港富翁。

原圖嚟自網絡。