台灣知名作家李敖4年前生腦瘤，去年病情轉差逝世，終年83歲。李敖直率敢言兼過火位嘅文學同政治風格，唔單止令佢成為台灣最知名嘅人物之一，仲令佢得到「狂人」呢個稱號。李敖亦曾經响鳳凰台主持節目，分享咗好多對史事嘅獨特睇法，令觀眾印象深刻。

李敖1935年喺黑龍江哈爾濱出世，國共內戰之後隨父母赴台，先後喺台灣大學歷史系、歷史研究所就讀，1961年畢業之後，喺文學雜誌《文星》撰稿，開始佢嘅文學生涯，李敖喺佢嘅作品當中抨擊國民黨政府，又支持自由主義和民主等西方文化價值觀，被視為最早反國民黨人之一。喺1971年，李敖被當局以「台獨」罪名，遭逮捕入獄，直至1976年因為蔣介石逝世而獲得特赦。

李敖除咗係一個作家，亦都係一個政治人物，喺2000年李敖代表新黨參加台灣總統大選，支持統一，又呼籲實行「一國兩制」，最終得票只有0.13%落選，但佢4年之後，以獨立候選人身份，得到三萬幾票而當選立法委員。入到立法院，李敖繼續佢敢言嘅風格，有一次開會，佢竟然戴防毒面具、手持催淚彈入場，嚇到其他立委四圍走。去到2005年，李敖展開神州文化之旅，先後到北京大學、清華大學同復旦大學演講，為大批學生上咗與眾不同嘅一課。

原圖取自網絡。