嚟緊台灣2020年會舉行總統大選，國民黨同民進黨嘅人士亦紛紛開始表態參選。講到台灣大選，話說喺2004年今日，當時爭取連任嘅台灣總統陳水扁同副總統呂秀蓮喺選舉前夕，喺台南坐吉普車拉票，期間突然中槍，面露痛苦表情。警方表示，槍手當時開咗兩槍，其中一槍子彈擦過陳水扁個肚，另一槍就打中呂秀蓮膝頭。因為依兩槍，令當年選舉掀起唔少波瀾。

警方後嚟認定槍手係台南人陳義雄，但陳義雄喺槍案發生9日後於台南安平港溺斃，令案件「死無對證」。槍擊事件逆轉總統選舉形勢，陳水扁、呂秀蓮喺翌日舉行嘅總統選舉投票中，以不足3萬票、得票率0.228%之差，擊敗原本形勢比較有利嘅藍營國民黨連戰同新民黨宋楚瑜組合而當選。

當時有學者估計，有四十到五十萬中間選民因槍擊案而投咗陳水扁，當中有人出於同情，有人就懷疑係藍營策劃件案，所以改投綠營，令選情嚟個「大轉彎」。不過有唔少藍營支持者質疑，槍擊案係民進黨自導自演，選舉後多處發生暴力衝擊，藍營提出當選無效、選舉無效，但最高法院判敗訴，確認陳水扁成功連任。

原圖取自網絡。