唔少人鍾意飲茶，紅茶、綠茶、花茶各有支持者，咁唔知清朝嘅皇帝又鍾意飲咩茶呢？雖然各人喜好唔同，不過佢哋都好重視一隻茶，答案就係普洱喇。

著名作家老舍曾經問過末代皇帝溥儀，佢做皇帝果陣通常飲咩茶？溥儀就話，清廷慣咗夏天飲龍井，冬天就飲普洱，普洱就係皇室嘅標誌。究竟清朝皇帝鍾意普洱到咩程度？據記載，光緒每年要飲成33斤普洱，仲未計佢用嚟啷口嗰啲。

之不過，原嚟普洱之前並唔係皇家最鍾意飲嘅茶。明代以六安茶為尊，去到清朝皇室先比較鍾意飲普洱，原因好簡單，因為冬天飲普洱既可暖身又可解油膩。清朝皇族嚟自遊牧民族，偏好食肉，如果飲食唔節制就會易病，所以特別青睞普洱茶。

普洱茶除咗係皇室成員嘅御用茶外，仲係朝廷饋贈各國首腦、貴賓嘅禮品，所以每年都要靠地方進貢大批茶葉上京。普洱同其他茶葉嘅上貢制一直持續到光緒三十年，後嚟因為清朝末期社會動盪，貢茶送到昆明附近一帶被賊人搶走，清廷鞭長莫及，無追究到，貢茶制先步向結束。

資料嚟自金羊網，圖為光緒畫像及《步步驚心》劇照，原圖嚟自網絡。