珠海唐家灣猛人輩出,中華民國政府首任內閣總理唐紹儀、著名粵劇編劇家唐滌生、粵劇紅伶唐雪卿等名人都嚟自唐家灣。而清華學校(清華大學前身)創辦人唐國安同樣係唐家灣人,佢擔任過《南方報》英文版社評主筆,又曾經任職清政府外務部,對中國新聞、外交同高等教育發展有相當重要嘅貢獻。

唐國安生於廣東珠海唐家灣,幼時喺私塾讀書,後嚟經族叔唐延樞舉薦,成為清政府第二批官費美國留學生。1880年,當唐國安啱啱考入耶魯大學法律系嘅第二年,就因為清政府中斷留學計劃而被逼提前回國。返咗中國之後,唐國安曾經喺開平煤礦、京奉鐵路等地方任職,其後轉到上海梵王渡約翰書院任教。 1908年,美國政府同意將「庚子賠款」中超出美國實際損失部份嘅賠款退還俾中國,用嚟當做派遣中國學生赴美留學嘅經費。呢件事唐國安都有份參與籌劃,仲喺第二年設立游美學務處,更喺清華園籌建游美肄業館。呢批留美學生大部份成績優異,好多喺回國之後都成為社會棟樑,包括物理學家梅貽琦、提倡白話文嘅胡適、氣象學家竺可楨等等。

1911年,游美肄業館正式改名做清華學堂,並舉行開學典禮,由唐國安主持籌辦兼任副監督。不過因為辛亥革命爆發,學堂一度要停課關閉。翌年5月,清華學堂正式複學,仲改名做清華學校,由唐國安出任第一任校長。佢上任之後全面整頓學校,包括修訂學校章程、強調庚款專款專用、聘請品學兼優嘅外國教授、聘請美國醫生為學生定期做身體檢查同醫病、為清華選定繼承人等,對學校未來嘅發展貢獻良多。可惜,唐國安最終因為心臟病同長期疲勞,喺清華園逝世,係清華迄今為止唯一一位喺任期內過身嘅校長。

圖片嚟自網絡。