早幾日係哥哥張國榮死忌，身邊都有朋友返睇佢嘅影視作品，重溫巨星嘅傳奇演出。其中一位仁兄向阿史推介電影《緣份》，除咗男主角張國榮，主演嘅女主角有張曼玉同梅艷芳，大玩幾角戀同地地鐵「緣份遊戲」，卡士同內容絕對對得住觀眾。

巨星都係由過去唔少青澀片段同成長經歷所組成，拍依套1984年嘅作品時，當年嘅張國榮熱唱《Monica》，而梅艷芳贏咗新秀冠軍兩年，張曼玉就响前一年勇奪香港小姐亞軍同最上鏡小姐，最美好嘅年華，佢哋拍咗《緣份》。 梅艷芳仲憑住套戲嘅出色表現，奪得金像獎最佳女配角獎項。

套戲好唔好，大家睇咗就知，不過最經典嘅係，大家可以响套戲入面，見到35年前嘅地鐵售票機、有條紅色邊嘅車頭、扶手底部仲係個黑色球等，真係有唔少回憶湧上心頭。

劇照嚟自網絡。