正嘢又點會得一次?星期一去完九龍塘嘅小學之後,史檔工作室好榮幸又收到邀請,今日轉戰上水,去聖公會陳融中學分別為中一到中二,以及中三到中五嘅同學仔舉行兩場講座,分享《區區有故講》嘅趣事。

今次班學生好犀利,有好幾條問題都第一時間知道答案,好似馬騮山點解有馬騮咁,有位同學連清除有毒植物嘅原因都講埋出嚟,果然後生可畏。之後問到海洋公園前身係咩地方時,有位同學好踴躍咁舉手,答係「威威公園」。點解?佢話係班主任嘅貼士,點知答案居然係「新巴黎農場」,位阿sir認真鬼馬,好大機會係教啲學生要有批判性思維,唔好人哋講完就信,要小心求證。

至於油麻地點解叫油麻地?依條問題繼續令同學仔發揮小宇宙,有位男同學話中文應改由右邊讀佢左邊,所以油麻地開初嘅讀法應該係「地麻油」,佢認為嗰地方有好多麻油,因而得名。雖然唔啱,但創意分爆燈。

做完兩場講座,史檔工作室發現陳融中學嘅同學仔真係好中意睇書,好多時問佢哋點解會揀依個答案,佢哋都答話係睇過嘅書有講,而到最後送咗幾本書畀答啱問題嘅同學時,台下有位女同學好興奮咁講咗句「有書送」,真係對閱讀好有興趣同熱情,點都要畀個like佢~