香港警隊一共有7支特種部隊，除咗大家好熟悉嘅飛虎隊同之前提過嘅G4之外，仲包括喺機場工作嘅機場特警。

香港嘅機場特警組（Airport Security Unit，ASU）喺1977年成立，至今有超過40年歷史，最初由只有28名飛虎隊隊員借調機場組成，但發展至今已經有過百位成員。機場特警除咗主要負責機場反恐工作、保護要員同災難應變等工作，原來連野豬、行李都關佢哋事！話說喺2016年，有兩隻野豬闖入機場停機坪，職員擔心佢哋會走出跑道影響飛機升降安全，所以報警，警方就派機場特警去捉野豬。機場特警手持盾牌，經過一輪追逐之後，活捉咗其中一隻，而另一隻就走得快好世界，跳海走甩。另外，有次機場保安發現有行李擺咗喺度兩小時無人理，機場特警懷疑係炸彈，於是就急call爆炸品處理科到場，並且疏散旅客、封鎖客運大樓，最後係虛驚一場，其實係旅客行開咗去食嘢。

雖然機場特警只係响機場工作，但要求一啲都唔簡單，遴選過程相當嚴格，要做引體上升最少18次、150磅臥推舉等十項體能測試先過到第一關，第二關遴選包括：體能、戰術、心理韌性測試、應變能力、槍械、壓力管理等等，嚴謹程度可以話僅次於飛虎隊，一般100人參加，都唔超過20人有得留低，經過三個月訓練之後，再篩選完先正式成為機場特警。根據機場特警組成立40週年嘅資料，40年來只出過八個女機場特警，現役就得兩個女機場特警。

原圖取自網絡。