之前講過警隊多個特種部隊,今次係時候要講吓最出名、經常成為影視作品題材嘅飛虎隊喇!飛虎隊嘅成立係同70年代一單劫機案有關嘅。話說喺1971年3月13日,一架菲律賓航空公司嘅客機被騎劫嚟到香港,事件轟動一時,好彩得以妥善處理。不過警隊就憂慮,日後會有更多同樣嘅恐怖活動發生,於是就响1973年挑選精英組成一支「神槍手隊」,翌年再將神槍手隊升格為「特別任務連(Special Duties Unit,SDU)」,以打擊恐怖活動及嚴重罪案。

飛虎隊非常神秘,成員嘅身份、訓練地點都係嚴格保密,就算係警隊內部都未必知邊個係飛虎隊,佢哋每次出勤都係戴晒頭套遮面,以防身份被識穿、遭到報復。話明係飛虎隊,遴選過程一啲都唔簡單,報考者要接受11日嚴格遴選,包括體能、紀律、心理質素等各方面,當中只有大約1/4人過到關,之後就要接受9個月艱苦嘅訓練,包括响「地獄週」一次跑兩轉麥理浩徑麥理浩徑、响有樓梯嘅黑暗密室逃脫出嚟等等,期間通過唔到定期考核,一律無得留低。

而飛虎隊成立近50年嚟,只係得一位女警做過飛虎隊,負責行政工作,無上過前線。唔講唔知,原來警隊前一哥鄧竟成都做過飛虎隊主管,期間佢參與過多項危險行動,包括喺1984年大坑浣紗街圍剿械劫寶生銀行嘅大圈幫,期間雙方駁火60槍,4名悍匪最終被捕。

近年飛虎隊最接近市民嘅一次任務,要數2014年啟晴邨槍擊案,當年5月31日晚一名男子响樂晴樓被槍殺,警方翌日鎖定槍手係同一座嘅住戶,雙方仲一度駁火。最後飛虎隊包圍單位,槍手最後喺飛虎隊攻入單位前自殺身亡,當時有唔少傳媒影住過程。

圖片為飛虎隊當年到啟晴邨執行任務,取自網絡。