東華早年除咗為海內外華人提供中醫、喪葬等服務，但估唔到原來打擊「賣豬仔」都有東華份？其實依件事係同一位被控喺船上殺人、做海盜嘅華工有關。

話說早喺1870年，東華就庇護咗一名叫郭亞勝嘅華工，佢當時被控喺船上殺人、做海盜等罪名，但由於佢係被賣到秘魯打工時反抗，當時嘅正按察司就裁定佢有權保護個人自由，裁定無罪。喺郭亞勝獲釋之後，東華就為佢提供住宿。同年，一架澳門開出、載住650名華工嘅輪船航行時失火，約600人被燒死，少數倖存者嚟到香港之後，亦由東華負責照顧。

經過報道之後，大家慢慢知道東華會出手幫被賣豬仔嘅華工，後嚟喺1871年，東華收到匿名報告，話有大約200名華工被賣到美國，東華立即通知華民布政司，救出班華工，開啟東華致力阻止「賣豬仔」嘅工作。東華當時同上任港督無幾耐嘅堅尼地商討，由政府出糧、東華聘請偵探，調查「賣豬仔」案件。另一方面，當時法例亦要求載華工出海嘅船隻，要有港督批准，並由政府人員上船查證無華工被拐騙，先可以開船。當時嘅政府人員中文水平有限，於是就由東華協調當局錄口供，東華仲會為獲救華工提供食宿，再佢哋遣送返鄉下。

原圖為被賣豬仔嘅華工，取自網絡。