唔知有無史友有記得亞視九十年代有套《歷史也瘋狂》？套劇用搞笑方式呈現歷史故事、冷知識等，主持人包括安德尊、盧海鵬、李麗蕊等，仲有一位就係亞視鎮台之寶兼金牌司儀兼劉志榮。佢喺2008年5月15日病逝，年輕嘅史友可能對佢無乜印象，等阿史今日簡單介紹吓佢嘅生平同作品。

劉志榮1952年出世，爸爸係香港著名老牌電影演員、粵劇老倌劉克宣，劉志榮喺1973年响麗的做起，做到去亞視年代，非常忠心，可以話係亞視嘅「鎮台之寶」。喺麗的時代，佢拍過嘅電視劇包括《梁天來》、《變色龍》、《大地恩情》、《浮生六劫》等等，喺亞視佢就拍過《Q表姐》，而佢最後一部為亞視拍嘅就係1997年嘅《 97變色龍》。除咗拍劇，佢仲擅長主持綜藝節目，有「金牌司儀」之稱。

喺麗的、亞視工作期間，佢同藝員梁淑莊因為合作拍劇相戀、結婚，成為圈中嘅模範夫婦。劉志榮喺香港回歸之後，1998年離開公仔箱從政，1999年當選成為油尖旺區區議員。

原圖取自網絡。