無綫套《倚天屠龍記》播咗差唔多成個月,上個星期終於播到女主角趙敏出場,真係等到花兒也謝了。阿史上禮拜同大家講過張無忌嘅原型好可能係「小明王」韓林兒,今日一於講埋唔少人眼中嘅趙敏原型——元末將領王保保嗰妹、結局勁慘情嘅王氏。

金庸筆下,原名敏敏特穆爾嘅趙敏係蒙古郡主,唔少人研究完一輪,認為佢嘅原型好有可能係元末將領擴廓帖木兒(即係王保保)嘅妹妹,傳聞話佢個名叫觀音奴。小說入面嘅王保保膽小怕事,但真實嘅王保保好打得,係當時出名嘅大將之一。明太祖朱元璋好欣賞佢,曾多次招攬佢卻不果。據《明史》記載,朱元璋曾經問過下屬邊個係世間嘅奇男子,個個都答係常遇春。朱元璋就話,常遇春再勁都要聽佢支笛,但王保保唔同,點都唔肯臣服自己。

由於王保保點都唔肯投降,朱元璋久攻不下,於是叫自己個仔朱樉娶咗王保保個妹,仲冊封女方做秦王妃添。可惜呢場政治婚姻並無咩好結局,婚後兩公婆感情疏離,朱樉仲要早逝,搞到秦王妃要殉葬,令人留下聲聲歎息。

圖為《倚天屠龍記》劇照,原圖嚟自網絡。