屯門青山好出名,相信好多人都知,當中嘅紅樓更加同香港以至中國近代史有好重要嘅關係。曾經係辛亥革命策源地嘅紅樓喺2017年面臨拆卸危機,最終被為暫定古蹟,暫時避過一劫。紅樓當年係青山農場嘅管理事務所,而孫中山據說曾經同側室陳粹芬喺紅樓居住過。當年香港「革命富人」李紀堂响惠州起義失敗之後,就喺屯門青山買咗塊地,經營青山農場,作為另一個革命黨基地,並且收留由內地逃亡、海外回歸嘅革命志士。

農場當年設有軍械庫、炸藥庫、糧餉倉,甚至係射擊靶場,而紅樓仲係革命黨人黃興策劃軍事行動嘅地方,黃花崗起義就係响紅樓人員集合、組織、軍械、糧餉同通訊,可以話係對革命非常重要。其實1908年革命黨人已經策劃暗殺清朝重臣,於是响青山農場試驗炸彈。後嚟青山農場批炸藥運去漢口,點知計劃有變,佢哋將炸藥交予革命黨人孫武保管,而製造炸彈期間唔小心搞到爆炸,成為1911年武昌起義嘅導火線。

順帶一提,當年李紀堂响中環開咗間「青山棧」,專門賣青山農場嘅產品,其中農場出產嘅雞蛋質素非常好,深受西方人士歡迎,據講青山棧賺返嚟嘅錢就足以支持農場運作。

圖為青山紅樓、孫中山,取自網絡。