做過《創世紀》嘅葉榮添、《難兄難弟》嘅李奇、《天地豪情》嘅卓尚文、《流金歲月》嘅丁善本等等，演員羅嘉良攞過三次視帝獎項，實力係點相信都唔駛多講。除咗上面幾套戲之外，仲有題材非常新鮮嘅《先生貴性》，佢飾演嘅大男人鄧炳權兼男扮女裝嘅Diana，令唔少觀眾留下深刻印象。

廿年前播出嘅《先生貴性》講羅嘉良同女主角陳慧珊齊齊遇襲，點知男嘅大步檻過，女嘅就無咗條命仔，之後陳慧珊上咗羅嘉良身，扮成女人去查案，而同劇演員仲有江華、郭少芸、張燊悅等。雖然羅嘉良嘅女裝扮相實在一般般，全世界都知係男人扮，不過佢會唔經意咁做出一啲女性小動作，成為經典角色之一，最後羅嘉良同陳慧珊大團圓結局，觀眾絕對收貨。

不過講到心水羅嘉良作品，阿史心目中嘅the one之一要數亞視1986年電視劇《秦始皇》主題曲，「夷平六國是誰，哪個統一稱霸，誰人戰績高過孤家？」齋氣勢已經贏曬。

原圖取自網絡。