香港亞洲電視長期受財務問題困擾,喺3年幾前熄機,令幾十年廣播生涯暫告一段落。不過,亞視亦曾經風光過,佢嘅前身麗的映聲係香港首間電視台,製作同播出咗唔少經典電視節目。

講開麗的映聲嘅誕生,就要由「麗的呼聲」講起。麗的呼聲原本係英國電纜轉播商,直到1954年,英國立法成立民營獨立電視台(ITV)網絡,麗的呼聲隨後先成為成個ITV網絡入面首家開播嘅電視台。1957年,麗的呼聲攞到香港政府嘅電視廣播牌照,改名麗的映聲。麗的映聲成立嘅時候,仲有時任港督撐場致辭添。

麗的映聲最初只有黑白英文頻道,同時用英文同粵語播放每日傍晚4個鐘嘅節目。當時要收睇電視嘅市民要交安裝費、租機費同牌照費,真係唔係一般市民可以睇得起。直至1967年,麗的映聲先以無線方式免費廣播,再喺1973年改為無線免費電視台麗的電視。 

麗的電視曾經推出長篇劇集《大地恩情》,收視力壓隔離無綫由鄭少秋、鄭裕玲主演嘅《輪流傳》,最後更令《輪流傳》被逼腰斬。其後亞視年代製作嘅劇集《我和殭屍有個約會》、綜藝節目《百萬富翁》等亦成為香港人嘅集體回憶。

圖為廣播道嘅麗的呼聲大廈,原圖嚟自網絡。