之前講開演員林嘉華從演前讀過少年警校，做過警察，到底少年警校係咩嚟呢？話說响1973年9月，由於罪案增加、警隊出現招募困難，政府同意警方將粉嶺芬園將一所棄置軍營改建成警察少年訓練學校，吸納一啲讀完初中但上唔到高中嘅少年入讀。

要考入少年警校都唔易，需要經過體能測試、面試同筆試，全部過關先至可以入讀，少年警校學生會接受為期兩年嘅訓練，畢業後相當於中五程度，可以投考警察或者其他政府工。少年警校設計類似寄宿學校，需要留宿訓練，學員係要著制服接受檢閱、步操去課室上堂。

曾經喺少年警校擔任教職嘅退休總警司徐耀光就話過，等呢啲有資質但未夠年紀入紀律部隊嘅青少年讀少年警校，可以喺佢哋思想未成熟、容易受外界影響嘅時候，為年輕人提供適當教育、品格培養、體能同職前訓練，畢業後容易適應紀律部隊生活。

後嚟香港經濟起飛，政府提供免費中學教育，警隊希望請啲中學畢業嘅青年做警察，招募警員亦無之前咁困難，最終少年警校响1990年結束營辦，呢段時間一共訓練咗超過4000名少年，佢哋之後投身警隊或其他紀律部隊以及各行各業，繼續為社會作出貢獻。

圖為少年警校畢業相，取自網絡。