喺1919年五四運動爆發後，全國各地罷課、罷工、罷市，而香港嘅民眾亦都抵制日貨，以示聲援。當時日本駐港領事憂慮反日情緒蔓延開去，於是就向港英政府發出照會，要求取締有反日內容嘅報刊同書籍。

收到日本方面的要求，當時華民政務司通知《循環日報》、《華字日報》等中文報紙，唔可以提帝國主義、抗日愛國、妨礙治安嘅內容。而日本亦要求禁止私立漢文學校用上海會文堂出版嘅《初等論說文範》做教材，話書中有提倡國貨、抵制日本嘅言論，聲稱有傷日本體面、妨礙英日邦交等。

如是者，港英政府派人到學校檢查有無用《初等論說文範》，又向課本命題涉及抵制日貨、提倡國貨嘅中文老師作出嚴厲警告。同時，警方又派員調查書局有無《初等論說文範》存貨，一旦發現就即刻沒收。

原圖取自網絡。