電影《哥斯拉II：王者巨獸》啱啱上畫，令依隻大家都熟悉嘅怪獸再次重現銀幕。香港相信無咩人唔識哥斯拉，不過大家又知唔知，哥斯拉嘅創作靈感之一，係同五十年代美軍試爆氫彈、導致日本漁船中招有關？

日本漁船「第五福龍丸」1954年响馬紹爾群島附近捕魚，與此同時，美國响群島嘅比基尼環礁試爆氫彈，據報比1945年轟炸長崎嘅原子彈威力大一千幾倍，令到周圍水域嘅魚類受到污染。被蒙在鼓裡嘅「第五福龍丸」照樣捕魚，將受到核污染嘅漁穫運返日本。件事曝光之後，有份售賣相關漁穫嘅築地只能夠有殺錯無放過，將差唔多時間運上岸嘅魚類全部就地掩埋，並展開大清洗同消毒，搞到築地市場嘅交易冷清咗一排。

講返隻船，「第五福龍丸」有23個工作人員感染輻射，當中有船員更因此身亡，包括40歲嘅無線電長久保山愛吉。事件導致日本爆發大規模反核擴散示威，美國對相關船員作出賠償，希望日本政府從此封口。

「第五福龍丸」嘅遭遇成為哥斯拉系列電影嘅靈感來源之一，被輻射感染而誕生嘅哥斯拉起初响五十年代係邪惡破壞王，令經過嘅城市遭殃，同美軍試爆氫彈嘅破壞力不相伯仲。「第五福龍丸」目前保存於東京江東區夢之島公園內，繼續沉默咁展現氫彈嘅威力。

原圖取自網絡。