近期《倚天屠龍記》熱播,有人將唔同版本嘅金毛獅王謝遜拎出嚟比較,唔少人都話石堅個版本最正。其實石堅細個嘅時候因為體弱多病,於是就喺九龍一間精武體育館習武,學過羅漢拳、北螳螂拳、鷹爪、少林、摔跤同西洋拳等等,練成一身好功夫。到咗1949年,導演胡鵬開拍《黃飛鴻之鞭風滅燭》,為咗增加真實感,請咗啲識功夫嘅人嚟做主角,當時就搵咗關德興演黃飛鴻,而反派角色就搵咗石堅嚟做。石堅其後演出多套《黃飛鴻》系列作品嘅奸角,奠定「奸人堅」嘅經典形象。

講返少少石堅嘅背景資料先,佢生於1913年,係廣東番禺人,原名石榮璋,同李小龍爸爸李海泉係老友。李小龍細個嗰陣,已經成日同入片場睇石堅拍《黃飛鴻》,而李小龍大個之後,曾經喺《龍爭虎鬥》入面同石堅合作,係佢哋二人唯一一次幕前合作。石堅一生演過唔少奸角,响影視界發光發熱,佢十年前因病逝世,終年96歲。

圖片為《龍爭虎鬥》劇照,取自網絡。