上次講完响第一次鴉片戰爭壯烈犧牲嘅陳化成，今次就介紹埋另一位英雄──葛雲飛。佢生於乾隆五十四年（1789），嘉慶年間考中武舉人、道光年間中武進士，做咗守備，之後因為多次緝捕海盜有功，得到多番提拔，喺道光十八年（1838年）代理定海鎮總兵，其後獲得正式任命。

無幾耐，英國將領璞鼎查（亦即係砵甸乍）率領29艘艦隻、2萬幾名士兵進攻定海，葛雲飛聯同壽春鎮總兵王錫朋、處州鎮總兵鄭國鴻領兵分別鎮守土城、竹山門同曉峰嶺，由葛雲飛鎮守前沿嘅土城，並負責協調同指揮三軍作戰。三位將領率兵同英軍激戰六個晝夜，抵擋一次又一次嘅進攻，王錫朋同鄭國鴻先後壯烈犧牲，曉峰嶺同竹山門失陷，英軍隨即向土城進迫。鴉片戰爭博物館嘅資料顯示，葛雲飛當時率領200幾個士兵殺入敵陣，期間被一名英國軍官用刀劈中個頭，半塊面無咗，但葛雲飛依然搏命揮刀殺敵，力抗敵人嘅火槍圍攻。最後葛雲飛奮戰而亡，同其他士兵一齊壯烈殉國。

原圖取自網絡。