民國時期，原本係大總統嘅袁世凱最終做咗83日皇帝就被逼撤銷帝制，最後仲落得「竊國大盜」嘅罪名。其實袁世凱為咗做皇帝，真係可以話無所不用其極，連「自製民意」都用埋，可以話係招數盡出。唔單止咁，佢當年信風水師傅講，認為起座城門就可以令反對勢力投降，坐穩龍椅。

喺袁世凱正式稱帝前一個月，護國軍總司令蔡鍔同滇軍始創人唐繼堯喺雲南發動護國戰爭，討伐袁世凱，而貴州、廣西亦相繼響應。一心稱帝嘅袁世凱亦發現自己嘅手下開始唔聽話，幾乎搞到眾叛親離乜滯。呢個時候，袁世凱大仔袁克定介紹風水師傅賈興畀爸爸，賈興話點解元明清以來，無邊個家族可以一直穩坐皇位？正正就係因為中南海向南嘅方位無一道正門。賈興仲話，只要喺新華宮前起一座城門，果啲反對勢力就會投降。袁世凱乖乖聽話，真係照做，將北京寶月樓前嘅一段皇城拆除，起咗「新華門」。

根據《洪憲紀事詩本末》記載，袁世凱仲喺新華門入面起咗個廁所，原因都係同風水有關。當然，最後新華門對袁世凱做皇帝一啲幫助都無，只係為北京留低咗個景點。

圖為袁世凱同新華門，原圖嚟自網絡。