唔知大家有無去過上環荷里活道嘅文武廟呢?大家又知唔知文武廟最初唔單止係供奉文、武二帝嘅地方,亦係以前華人議事同仲裁嘅場所。

文武廟大概喺係1847年至1862年期間落成,由文武廟、列聖宮同公所三幢建築物組成。廟宇最初係由華人富商興建而成,文武廟主要供奉文昌同武帝,列聖宮係供奉諸神列聖嘅地方,而公所就係區內華人議事同排難解紛嘅場所。直到1908年,香港政府頒佈《文武廟條例》,將文武廟同埋佢嘅所屬廟產交俾東華醫院管理。1958年,政府修訂《文武廟條例》,訂明文武廟廟宇及其收益,除咗用嚟每年供奉神祀、重修廟宇同擴建之外,亦用嚟開辦學校教育華人子弟、資助香港華人慈善事業同埋擴充東華三院發展醫療服務。

多年來,文武廟嘅收益造福咗唔少人,而經過多次重修,文武廟分別喺1994年同2010年被香港古物諮詢委員會評定為一級歷史建築同法定古蹟。而東華三院董事局每年都會按照傳統,喺文武廟度舉辦隆重嘅秋祭儀式,酬謝文、武二帝,同埋為本地市民祈福。

圖為50年代嘅文武廟群,原圖嚟自網絡。