喺1938年6月14日，孫中山夫人宋慶齡喺香港成立「保衛中國同盟」，由佢擔任主席、宋子文擔任會長，以籌集醫藥、醫療器材，支援抗日。其實成立「保衛中國同盟」嘅故事，可以由1938年2月講起，當時新西蘭作家兼記者貝特蘭响漢口八路軍辦事處同辦事處主任周恩來會面，周恩來提及華北前綫缺乏醫藥嘅問題，希望對方可以組織起嚟，搵醫療物資，幫助八路軍同新四軍嘅傷病員，於是貝特蘭就將佢喺游擊區前綫見到嘅情況，寫咗份詳細報告俾宋慶齡。

 宋慶齡知道之後，就委託廖仲愷同何香凝個仔廖承志，代佢開咗個會，會上廖承志表示要組織一個國際性組織，並通過以宋慶齡選定嘅「保衛中國同盟」作為組織名稱。喺5月，有關方面聯同香港國防醫藥籌賑會，舉辦英、美、中三國書畫藝術展覽會，宋慶齡等人邀請前北京大學校長蔡元培喺開幕儀式上致辭，呼籲大眾喺抗戰中負起任務。

後來，香港中英文化協會舉行花園茶話會，港督邀請宋慶齡出席，並肯定宋慶齡喺香港嘅工作，如是者香港嘅八路軍辦事處接待一批又一批嘅外國志願人員同海外捐款，宋慶齡同廖承志眼見形勢有利，於是就喺6月14日正式成立「保衛中國同盟」。

圖片為保衛中國同盟委員合照，左四為宋慶齡，取自網絡。