喺民國成立之初，關於男女平等嘅議題仲未得到廣泛討論，唔少男人認為女性唔適合參政，強烈反對女人議政。瀟湘三女傑之一、湘軍提督唐星照個女唐群英為咗爭取女性參政權，不惜當眾怒摑國民黨代理理事長宋教仁。其實唐群英仲曾經同孫中山見面，表達對於男尊女卑嘅反感，認為家國天下事並唔單止係「匹夫之責」，提出「天下興亡，人皆有責」嘅主張。

唐群英細細個就學劍法、扮穆桂英出征，又受《婦女之苦總論》、《大同書》、《天演論》等書籍影響，經常為鄉下姐妹們抱打不平。後嚟，唐群英識咗女權革命家秋瑾，先後加入咗華興會、同盟會，更加激發佢要為女性發聲嘅志向。1911年，唐群英喺上海創建女子團體「女子後援會」、「北伐軍救濟隊」等支持辛亥革命，募集軍餉物資送去前綫、救護傷兵，唐群英仲親自帶女兵上前綫攻城，真可謂巾幗不讓鬚眉。

為咗紀念唐群英喺辛亥革命嘅貢獻，獲孫中山授予「二等嘉禾」勛章，仲被稱做「創立民國的巾幗英雄」。唐群英隨後起草咗《女子參政同盟簡章草案》，不過就被臨時參議院否決。唐群英並無氣餒，聯絡咗幾位女性精英將五個婦女團體合併做「中華民國女子參政同盟會」。自同盟會改組成國民黨之後，女性權力無因此提高，仲删除埋原同盟會政綱入面關於男女平權嘅條文。唐群英多次要求審議婦女參政權不果，一怒之下，就當眾摑咗宋教仁一巴掌。經孫中山從中周旋之後，唐群英將爭取女權嘅中心轉去辦報興學，大力宣傳男女平等，提高女性知識水平以減少女性對男性嘅依賴。

圖為唐群英同宋教仁，原圖嚟自網絡。