喺康熙在位年間，有一位學識豐富、為官清廉嘅官員姚啟聖，為提升軍隊實力，不惜散盡家財。喺佢擔任福建總督期間，勸掂明鄭將領施琅為清廷效力，為清廷收復台灣立下唔少汗馬功勞。

姚啟聖生於浙江會稽，康熙二年參加鄉試，考獲第一名，獲任命為廣東香山知縣，執政期間偷開海禁同外商做生意，但因為當時有嚴厲海禁政策，結果搞到丟官。之後姚啟聖喺廣東經商，累積數十萬兩白銀嘅資產。後來，三藩之一嘅耿精忠起兵反叛，姚啟聖帶埋個仔，去到康親王傑書幕下效力，期間屢立戰功，最後勸降耿精忠，清廷感激姚啟聖，於是將佢升任為福建布政使。

喺姚啟聖出任福建布政使嘅時候，佢捐身家資助軍隊增強實力，因而獲得嘉獎，晉升為福建總督。姚啟聖之後勸掂明鄭將領施琅，為清廷效力，又向清廷推薦施琅出任福建水師提督，帶領福建水師。最終施琅不負眾望，擊退台灣水師，收復台灣，而姚啟聖可以話功勞唔細。喺收復台灣之後，姚啟聖患背疽，無幾耐就過身。佢過世之後，有官員舉報佢生前虛報維修船艦、軍械開支四萬七千兩白銀，《清史稿》記載，康熙念在佢過往功勞，不予追究。

圖為劇照，取自網絡。