喺軍閥割據時期，做大帥嘅幾乎個個都剪晒頭髮，得張勳一個仲留住條辮，所以佢又被叫做「辮帥」。張勳一直對復辟帝制念念不忘，不過，佢擁護清朝末代皇帝溥儀復辟只係維持咗12日就以失敗告終，咁究竟張勳復辟失敗之後嘅下場如何呢？由於張勳早年喺開灤煤礦、濟南魯豐紗廠等企業都有大量投資，所以佢復辟失敗後嘅生活一啲都唔苦，仲非常奢侈。府邸有成班工人之外，飲食方面更加係好豪華，仲食得好嘴刁添。

話說張勳復辟失敗後，北洋政府即刻出告示通緝，張勳就避到去荷蘭使館，加上張勳同皖系統領段祺瑞、直系統領馮國璋等人交情唔錯，令北洋政府對張勳嘅通緝困難重重。1918年，北洋政府解除咗對張勳嘅通緝令，張勳去咗天津生活。

張勳當時生活奢侈，佢除咗喺德租界、英租界都有自己嘅府邸之外，屋企嘅木匠、廚師、司機、僕人、丫鬟等僕人一應俱全，更加有租界警察局派嚟嘅警察看門口。住得咁氣派，飲食自然唔會差得去邊，據張勳身邊嘅下屬回憶話，單單係張勳嘅午餐，廚師就用咗揚州嘅手藝，再揉合江西同北京嘅做法烹飪，日常食嘅燕窩、魚翅、熊掌都係人哋送嘅精品，認真豪華。

除咗自己好食好住之外，張勳仲會開心些牙，經常招呼食客嚟府上食好嘢，每個月仲會俾生活費供養住班食客。咁嘅生活一直持續到張勳病逝，而佢嘅葬禮亦相當隆重，每日都有大量和尚、道士為佢誦經，張勳嘅靈柩從天津運返江西老家果陣，一路上有無數人祭拜佢。

圖為張勳畫像同天津舊居，原圖嚟自網絡。