上次講咗原子筆嘅發明，今次不如講埋鉛筆。阿史記得以前細個嗰陣，以為鉛筆係用鉛製造，試過被鉛筆拮到手，仲驚自己中鉛毒。講返鉛筆嘅歷史，最初可以追溯至2000幾年前嘅古羅馬時期，當時人會用金屬套夾住支鉛棒或者鉛塊嚟寫字，係名符其實嘅「鉛筆」。到咗16世紀，英國有牧羊人發現石墨礦石，用嚟喺羊身上做標記，後來有商人發現有利可圖，於是就將石墨切成條狀，喺市場上出售。

到咗1761年，德國嘅化學家法貝為咗解決石墨條易碎嘅問題，於是加入琉黃等，再經加熱、壓製，增強硬度。法國嘅化學家孔特喺1789年於法貝嘅基礎上，再加入黏土製成唔同硬度嘅石墨條。喺1812年，有美國人就製作木條，並放入石墨條，就成為而家嘅鉛筆喇。至於中國方面，1932年改建而成、位於九龍嘅為大華鉛筆廠，就係中國人出資嘅第一間鉛筆製造廠。

原圖取自網絡。