近排無綫熱播《倚天屠龍記》同《白色強人》，勾起大家對金庸劇同埋《妙手仁心》等重頭劇嘅回憶。响阿史心目中，經典重頭劇點都要計埋《封神榜》，無論演員選角同劇情都勁有水準，好似紂王鄭子誠嘅賤樣、姬昌食肉丸嘔兔仔、殷十娘嘅喊戲等片段，真係睇完再睇都一樣咁正。

套戲响2001年播出，由陳浩民飾演主角哪吒、苑瓊丹飾演媽媽殷十娘、元華飾演托塔天王李靖、錢嘉樂飾演二郎神楊戩、葉璇飾演楊蓮花、溫碧霞飾演妲己等，陣容強大，仲有雷震子嘅特別造型（個頭同啄木鳥嘴），真係想唔記得都難。

演員之中，苑瓊丹嘅表現好標青，好似落住大雨好心痛咁用碌棍喪打哪吒，以及响李靖企圖自殺時喊住咁講「切肉不離皮」、「我哋係一家人嚟㗎」，搞到觀眾都喊埋一份。經典場口仲有魯振順飾演嘅比干挖咗自己個七竅玲瓏心出嚟，仲要閃住金光；羅樂林飾演嘅姬昌個仔伯邑考被剁成肉丸，姬昌被逼食咗之後，嘔返十二隻兔仔出嚟；哪吒削骨還父削肉還母；葉璇變成蝴蝶陪伴哪吒等，幕幕經典。

其實唔單止套劇同演員受歡迎，《封神榜》首主題曲《封神》同樣令人記憶深刻，「暴君 率眾妖害人，人間 積怨何容忍」，大家記唔記得首歌係陳浩民同邊位同劇女演員唱？

原圖嚟自網絡。