喺1984年中英兩國簽署《中英聯合聲明》之前，香港立法同行政兩局議員响1984年4月尾、5月組團去英國倫敦，就香港前途問題游說國會議員同表達意見，但點知期間遭到英方阻撓。根據香港政壇元老鍾士元嘅回憶錄記載，當時兩局代表團一落機，就遭到英國傳媒圍攻，質問佢哋係咪嚟爭取香港人移民英國，原來係英國外交部預先向傳媒「吹風」，散播呢啲言論。

話說代表團當年去到英國國會，同英港以及英中兩個小組舉行聯席會議，當中英港小組嘅成員包括前港督麥理浩，點知麥理浩竟然批評代表團嚟得唔係時候、立場唔正確，其他英國議員亦附和麥理浩嘅講法，搞到成個聯席會議不歡而散。

唔止咁，代表團同英國外相賀維會面嗰陣，仲被賀維奚落，話代表團唔係由人民選舉產生，代表唔到香港人嘅意願，而代表團就話佢哋雖然唔係由選舉產生，但佢哋來自各行各業，確實知道香港人意願，並如實反映。會晤結束後，行政局首席非官守議員鍾士元向記者表示香港處於危險關頭，又呼籲如果市民支持兩局嘅立場，就應該公開表示。最後喺英國嘅代表團以及香港嘅兩局辦事處收到大量電報支持，代表團之後喺賀維嘅工作晚餐上將呢啲電報讀出，證明代表團反映香港人意見，搞到賀維非常尷尬。

圖片為兩局代表團，取自網絡。