清朝末代皇帝阿史就講得多喇,今日嚟講吓末代狀元劉春霖。據說佢係慈禧太后親筆欽點嘅狀元,而劉春霖中咗狀元之後嘅第二年,科舉制度就被廢除,佢因此成為中國史上最後一位狀元。日本人後嚟擁護末代皇帝溥儀成為偽滿洲國皇帝,想招攬劉春霖,點知劉春霖企硬唔應承,仲話寧願做乞兒都唔會做漢奸。

劉春霖係河北人,有學識之餘仲寫得一手好字,相傳慈禧就係見到佢啲字先對佢另眼相看。劉春霖中咗狀元之後,就被派往日本東京法政大學深造,回國後做過諮政院議員、直隸法政學校提調、北洋師範學校監督等職。九一八事變之後,日軍佔領咗東北三省,建立偽滿洲國,偽滿政府總理鄭孝胥特登派人去請劉春霖出任教育部長,劉春霖以年事已高為由推辭。

第二次鄭孝胥吸取教訓,事先拜訪咗劉春霖嘅好朋友,將劉春霖嘅脾氣、愛好問清楚,再帶上劉春霖鍾意嘅茶葉親自上門。鄭孝胥先唔講登門目的,反而同劉春霖講書法、講藝術,點知劉春霖早就睇穿鄭孝胥嘅意圖,等鄭孝胥一講明來意,劉春霖即刻將佢同啲手信掃地出門,一啲情面都唔講。

1940年,日本派出同劉春霖同科嘅進士王揖唐去請劉春霖出任偽北平市長。王揖唐恃住自己同劉春霖嘅交情,帶埋厚禮上門,諗住實無死,點知劉春霖一樣無面俾,仲鬧王揖唐:「做漢奸係唔會有好下場嘅!」王揖唐惱羞成怒,第二日就派兵去抄劉春霖家,將佢收藏嘅珍品全部沒收,甚至趕佢一家出門口。劉春霖依然唔肯屈服,憤憤放話「寧作華丐,不當漢奸!」認真夠吉士。

圖為劉春霖同王揖唐,原圖嚟自網絡。