上次講起中國近代思想家兼教育家梁啟超嗰幾個仔都好叻，好似大仔建築師梁思成咁，為保護古建築出咗唔少力。話說梁思成後生嘅時候遇過一場嚴重交通意外，導致雙腳一長一短，無辦法正常行走。意外發生喺1923年5月7日，當時北京學生正舉行五四遊行，梁思成同細佬梁思永揸電單車去追趕遊行隊伍，點知去到長安街嘅時候被北洋政府陸軍部次長金永炎嘅轎車撞到。眼見梁思成炒車受傷，但金永炎一於少理，居然叫司機繼續開車。阿仔受傷，兇手在逃，梁媽媽李蕙仙自然好嬲，仲衝去總統府攞返個公道。

話說炒車一刻，梁思成被架電單車壓住，不省人事，被拋出車受傷嘅梁思永立即去求救。其後梁思成確診腳部骨折、脊椎受傷。李蕙仙知道之後嬲到震，親自去總統府問責，再加上輿論壓力，最後迫使金永炎親自去醫院慰問，而當時嘅總統黎元洪亦出面賠個不是，先至平息到件事。

意外發生之後，梁思成去美國留學嘅計劃被迫推遲，而梁啟超亦都悉心照顧梁思成，仲鼓勵仔仔善用呢段時間研讀中國古籍，鞏固佢嘅國學基礎。而梁思成受傷期間，亦得到未來老婆林徽因嘅照顧，令雙方感情跨進一大步。

圖為梁思成，取自網絡。