相信有唔少球迷都知，香港足球喺上世紀風光過一排，其中一位出名嘅華人球員，就係有「中國球王」之稱嘅李惠堂喇。「看戲要看梅蘭芳，看球要看李惠堂」，一句民間美譽，就知佢幾有地位。喺1976年，一本西德足球雜誌評選出世界五大球王，而李惠堂就同比利、馬菲士、普斯卡斯、迪史堤芬奴一齊入選，成為當時舉世公認嘅「中國球王」。

李惠堂1905年喺香港出生，係建築業富商李浩如嘅大仔，本來被培養接掌家族生意，但佢自小就鍾意踢波多過讀書，仲成日偷偷地走去睇波。佢喺皇仁書院讀到中二就輟學，17歲加盟南華，喺C隊展開佢嘅足球生涯，隨即就成為乙組聯賽嘅神射手。李惠堂足球生涯踢咗千幾場比賽，射入超過1800球，佢腳力驚人，曾經隨南華去印尼踢比賽，主射罰球嗰陣，將對方一名荷蘭球員省暈咗，位仁兄昏迷成26小時先至醒得返。李惠堂自18歲起，就代表中國踢唔同國際比賽，曾經吸引英國阿仙奴、法國巴黎紅星等球隊垂青，但最終因為不同原因而不了了之。李惠堂喺1979年嘅今日病逝，終年75歲。

圖為李惠堂，取自網絡。