近日同香港有關嘅重要文件——《中英聯合聲明》再次受到大眾關注。香港近日經歷唔少風雨,而爭緊做英國首相嘅外相侯俊偉日前就香港局勢發表聲明,提到中方若果唔兌現《中英聯合聲明》,會後果嚴重咁話。對於英國嘅言論,中國外交部發言人反駁話,聯合聲明隨住香港回歸同埋過渡期工作結束,當中所規定同英方有關嘅權利義務都已經全部履行曬,依家英方對香港唔存在任何責任。雙方對份聲明都有唔同表述,咁究竟佢哋嘅分歧主要係邊度?

講少少背景先,《中英聯合聲明》由中國國務院總理趙紫陽同英國首相戴卓爾夫人於1984年12月19日响北京簽訂,保證香港「一國兩制」方針50年不變。至於近日中英雙方就聲明嘅性質各有解讀,好似侯俊偉話《中英聯合聲明》係具法律約束力嘅條約,到今日仍然有效。其實早兩年英國下議院開會時,提過英方認為份聲明係「條約(treaty)」,認為仍然有效力。

咁中國點睇?包括今次在內,中方曾經多次話份聲明係歷史文件,好似回歸20年嗰時,當時嘅英國外相約翰遜話中英兩國响聲明中立下對香港嘅承諾,隔咗幾十年一樣有力。呢番言論中方自然唔認同,當時外交部發言人已經反駁,話聲明只係份不具現實意義嘅歷史文件,對中央管理香港特區同樣無任何約束力。同一個月內,當時政制及內地事務局局長聶德權亦講到,《中英聯合聲明》嘅內容已透過《基本法》實行,表達中方嘅一貫立場。

對於中方嘅主張,或者可以由前中央政策組首席顧問邵善波嘅言論入面了解多啲。佢曾經提到中英雙方當年簽署嘅係「聲明(Declaration)」而非「協議」,所以從國家憲法基礎上恢復行使對香港主權,屬中國內政範圍。呢個立場,中方外交部發言人耿爽星期一再次提出,表明英方對回歸後嘅香港一無主權,二無治權,三無監督權,根本不存在任何「責任」,仲講到明叫英方唔好再干涉香港事務同中國內政。講咗咁多,大家對於聯合聲明嘅定位同性質又點睇?

原於取自網絡。