舊時啲人結婚講求門當戶對，兩家背景相差唔遠，婚後兩公婆先會琴瑟和諧。不過，事實總係事與願違，話說曾經做過大總統嘅袁世凱同軍閥曹錕對親家，曹錕個仔曹士岳同袁世凱個女袁祜禎就夠晒門當戶對，可惜婚後曹士岳家暴袁祜禎，兩公婆搞離婚搞到差啲要對簿公堂。

話說曹士岳係曹錕個大仔，佢出世嗰陣曹錕已經成57歲，老年得子嘅曹錕梗係錫到個仔燶，結果寵到曹士岳成個二世祖咁。後嚟，北洋軍閥嘅元老將袁世凱嘅遺腹女袁祜禎介紹俾曹士岳，兩家好快就結咗婚。初頭袁祜禎同曹士岳感情都唔錯嘅，但曹士岳成日不務正業又貪玩，婚後兩公婆成日為啲雞毛蒜皮嘅小事嘈交。有一日，曹士岳飲醉酒返嚟，兩公婆又嘈起上嚟，曹士岳先係扭斷咗袁祜禎隻右手，嬲起上嚟仲拎支槍出嚟嚇袁祜禎。最後曹士岳真係開咗一槍，打爛咗部電話。

袁祜禎阿哥袁克文得悉事件，嬲到即刻報警拉咗曹士岳。個仔做錯嘢，曹錕嗱嗱林出嚟補飛，袁祜禎入院第二日，曹錕已經叫人送錢去袁家賠罪，又派熟人疏通周旋。袁祜禎另一個阿哥袁克定已經決定庭外和解，但袁祜禎媽媽就點都忍唔落呢啖氣，企硬要將曹士岳告上法庭，還袁祜禎一個公道。最後都係袁祜禎出面阻攔，先無將兩家呢件事鬧上法庭，而袁祜禎最終都同曹士岳離咗婚，曹士岳除咗要賠醫藥費、贍養費俾袁祜禎之外，仲要將當初袁祜禎嘅嫁妝還返俾女家。所以話呢，家暴係要付出代價嘅，有咩唔啱咪講到啱，千祈唔好郁手啊嘛。

圖為曹士岳夫婦合照同當時新聞剪報，原圖嚟自網絡。