北韓最高領導人金正恩同美國總統特朗普六月底响板門店展開會面，雙方同意重啟談判，令無核化進程再露曙光。提到「白頭山血統」，喺25年前今日，即係1994年7月8日，金正恩爺爺、北韓最高領袖金日成心臟病發逝世，終年82歲。金日成喺1948年建立「朝鮮民主主義人民共和國」，掌權長達46年。金日成管治北韓期間，北韓軍隊於1950年跨過三八線，向南韓發動進攻，三天後漢城（現今首爾）失守，直至以美國為首嘅聯合國軍出兵支援南韓，全面反攻，直逼鴨綠江，最後金日成向中國求援，喺中國人民志願軍參戰之下，再將戰線壓返三八線，雙方拉鋸僵持，喺1953年7月簽訂《朝鮮停戰協定》，令朝鮮半島一分為二。

喺金日成逝世前，年事已高嘅佢依然每日工作10幾小時。1994年6月，美國前任總統卡特訪問北韓期間，金日成親自出席會談同宴請活動6小時，活動完咗仲親自處理北南首腦會談嘅方案，希望改善兩韓關係。喺6月18日，南韓總統金泳三接受舉行首腦會談建議，雙方代表之後喺板門店接觸，確定响7月25至27日喺平壤會面。但點知7月8日，金日成病逝，令兩韓和平進程突然中斷。

圖為卡特訪問北韓會唔金日成，取自網絡。