國寶級學者、經典作品《牛棚雜憶》嘅作者季羨林曾經喺德國留學,學習梵文、吐火羅文等,又因為第二次世界大戰,令佢足足喺德國逗留咗10年。喺德國期間,季羨林因為要靠鄰居幫手打字,因而經歷一段帶住遺憾嘅異國情緣,女方仲為佢終身不嫁。

話說季羨林嘅德國屋企附近住咗戶鄰居邁耶夫婦,佢哋有個活潑可愛嘅女,名叫伊姆加德。當時30歲左右嘅季羨林正喺度攻讀博士學位,論文喺交俾教授之前必須先用打字機打印出嚟,但嗰陣季羨林既唔識打字又無打字機。伊姆加德表示願意幫手打字,於是好自然咁,季羨林就要成日去鄰居屋企。因為季羨林嘅文章用字太艱深,改得比較亂,所以伊姆加德打字嗰陣通常都要季羨林在場,方便拆解季羨林嘅「天書」。兩個人成日一開工就做到三更半夜,慢慢咁,二人產生咗感情。工作之外,季羨林仲會同伊姆加德一齊行街、睇戲、買嘢,好似一對小情侶咁。

不過,季羨林早就成家立室,有妻兒喺中國,雖然只係包辦婚姻,但季羨林覺得如果因為愛情而同伊姆加德喺一齊,就等於背叛咗妻兒。經過一番痛苦掙扎,季羨林最後都係選擇離開德國去咗瑞士,放棄呢段感情。據講,伊姆加德終身未婚,而當時嗰台打字機依然保留得好好。

圖為年輕嘅季羨林同伊姆加德,原圖嚟自網絡。